Leyniréttarhöldum hafnað

Fulltrúar á landsfundi flokks frjálsra demókrata í Bretlandi höfnuðu frumvarpi um leyniréttarhöld, sem breska stjórnin hugðist fá þjóðþingið til að samþykkja.

Þetta er nokkuð áfall fyrir Nick Clegg, formann flokksins og aðstoðarforsætisráðherra í ríkisstjórn íhaldsmannsins Davids Cameron.

Stjórnin taldi nauðsynlegt að veita dómstólum heimild til þess að láta réttarhöld fara fram með leynd, í þeim tilvikum þar sem leyniþjónustan telur sér ekki fært að gefa upplýsingar, sem hún hefur aflað sér um sakborninga, án þess að stofna öryggi leyniþjónustumanna eða breska ríkisins í hættu. Flokksfélagar Cleggs töldu enga ástæðu til að leyfa slík réttarhöld.

Í ræðu sinni á lokadegi landsfundarins í gær hvatti Clegg flokksfélaga sína engu að síður til að standa þétt við bakið á ríkisstjórninni, þrátt fyrir harða gagnrýni almennings og stjórnarandstöðunnar á strangar sparnaðaraðgerðir.

„Fyrir kosningarnar var almennt talið að við gætum ekki tekið stökkið frá því að vera í stjórnarandstöðu yfir í að sitja í stjórn," sagði Clegg. „Tveimur árum síðar standa gagnrýnendur okkar forviða." - gb