Strákarnir hans Dags björguðu andlitinu í seinni hálfleik

Lærisveinar Dags Sigurðssonar í Füchse Berlin voru komnir í slæm mál í leik á móti Gummersbach í þýsku úrvalsdeildinni í handbolta í dag en tókst að tryggja sér 28-23 sigur með frábærum seinni hálfleik. Gummersbach er í hópi neðstu liða deildarinnar og var aðeins búið að vinna fjóra af fyrstu fimmtán leikjum tímabilsins.

Strákarnir hans Dags björguðu hreinlega andlitinu í seinni hálfleik en Refirnir unnu síðustu 25 mínútur leiksins 15-4 þar sem Ivan Nincevic fór á kostum. Nincevic var markahæstur hjá Füchse með 10 mörk en Johannes Sellin skoraði 7 mörk.

Gummersbach var 16-12 yfir í hálfleik en Füchse skoraði tvö síðustu mörk hálfleiksins eftir leikhlé hjá Degi. Füchse Berlin var síðan 13-19 undir í leiknum þegar fimm mínútur voru liðnar af seinni hálfleik en skoraði þá sjö mörk í röð og komst yfir í 20-19.

Füchse Berlin var síðan sterkara á lokasprettinum en Gummersbach-liðið var þarna að tapa sínum sjöunda leik í röð í þýsku deildinni.

Füchse Berlin er í 4. sæti deildarinnar en liðið var að vinna sinn þriðja leik í röð eftir að liðið tapaði tveimur leikjum í röð um miðjan nóvembermánuð.

Ólafur Gústafsson gat ekki spilað vegna ökklameiðsla þegar SG Flensburg-Handewitt vann 29-25 heimasigur á Frisch Auf Göppingen. Holger Glandorf skroaði 10 mörk fyrir Flensburg.

Björgvin Páll Gústavsson kom ekkert við sögu þegar SC Magdeburg vann öruggan 26-18 heimasigur á GWD Minden en hollenski markvörðurinn Gerrie Eijlers var besti maður leiksins. Vignir Svavarsson skoraði þrjú mörk fyrir Minden.