Grindavík fær sænskan varnarmann að láni

Grindavík hefur styrkt leikmannahópinn sinn fyrir komandi átök í Pepsi-deild karla með sænskum varnarmanni. Sá heitir Mikael Eklund og getur bæði spilað sem miðvörður og bakvörður.

Hann kemur til Grindavíkur sem lánsmaður frá sænska B-deildarliðinu Braga og mun snúa aftur þangað þann 31. ágúst. Hann er þegar kominn með leikheimild hér á landi og gæti því spilað með Grindavík gegn Fram í Laugardalnum á morgun.

Eklund er á 31. aldursári og hefur spilað í heimalandinu allan sinn feril, lengst af með IK Brage og Kalmar. Hann varð sænskur meistari með Kalmar árið 2008.

Fram kemur á heimasíðu Braga að hann hafi átt við þrálát meiðsli að stríða síðustu ár. Hann náði til að mynda að spila aðeins einn leik með Assyriska áður en hann sleit krossband í hné. Það var árið 2010.

Hann sneri svo aftur á völlinn með Braga í sænsku B-deildinni á síðustu leiktíð og kom þá við sögu í fimmtán deildarleikjum. Hann hefur komið við sögu í þremur leikjum á þessari leiktíð.

„Mikael hefur tekist að koma sér aftur af stað eftir sín meiðsli og vill fá að spila meira. Við getum ekki lofað því hér og því var ákveðið að fara frekar þessa leið," sagði Lars Håkman, yfirmaður íþróttamála hjá Braga, í viðtali á heimasíðu félagsins.

„Okkur finnst jákvætt að Mikael fái að spila marga leiki á Íslandi og komi svo aftur til okkar í góðu formi fyrir lokasprettinn í deildinni."