Stjórnvöld bjóða markaðsátak

Össur Skarphéðinsson utanríkisráðherra sagði í ræðu á Sjávarútvegsráðstefnunni í gær að aldrei hefði verið jafnbrýn þörf á sérstöku markaðsátaki fyrir sjávarafurðir frá Íslandi á mörkuðum erlendis. Hann lýsti yfir vilja sínum og atvinnuvegaráðherra til að standa að sameiginlegu átaki stjórnvalda og sjávarútvegsins og benti á samstarf ríkisstjórnar og ferðaþjónustu gegnum Inspired by Iceland sem fordæmi.

Össur benti á að aukin þorskgengd í Barentshafi hefði gert Norðmönnum og Rússum kleift að auka kvóta sinn sem nemur meira en öllum þorskafla á Íslandi. „Þetta þýðir það eitt að við getum gert ráð fyrir miklu harðari samkeppni á mörkuðum en við höfum átt í áður,“ sagði Össur og að eina leiðin til að bregðast við væri með stóraukinni markaðssókn. „Sennilega hefur aldrei verið jafnmikil þörf og nú á skipulögðu átaki fyrir íslenskan sjávarútveg á mörkuðum erlendis,“ sagði Össur.

Utanríkisráðherra sagði að til að halda í við Norðmenn í markaðsmálum þyrftu Íslendingar að verja 5-600 milljónum króna á ári í 30-40 markaðsverkefni á ári tengd sjávarútvegi.

Össur sagði fullan vilja til að „taka höndum saman með greininni og sveifla okkur saman í öflugt markaðsátak fyrir íslenskan sjávarútveg“. Sú skoðun hans átti breiðan samhljóm meðal annarra sem tóku til máls á ráðstefnunni í gær. - shá