Kona með reynslu

Nú er mikið rætt um ungan aldur Katrínar Júlíusdóttur en minna um þingreynslu hennar. Þegar Jóhanna Sigurðardóttir hættir á þingi verður Katrín sú þingkona sem eina mestu reynsluna hefur. Á fjórða kjörtímabili Katrínar hefur það ekki síst komið í ljós að reynsla skiptir miklu máli á krefjandi tímum. Sú staðreynd birtist í því að félagar hennar í Samfylkingunni treystu henni til að taka að sér sjálf ríkisfjármálin með því að velja hana til þess að setjast í stól fjármálaráðherra.

Kötu er treyst til verka

Það er ekki í fyrsta sinn sem Katrínu, úr fjölbreyttum hópi þingmanna Samfylkingarinnar, hefur verið falin erfið verkefni. Fyrr á kjörtímabilinu stýrði hún iðnðararáðuneytinu þar sem hún sýndi að henni er treystandi til að taka málefnin föstum tökum. Þannig var stefna Íslands í skapandi greinum, mótun hönnunarstefnu með aukinni samvinnu hönnunar og nýsköpunar, heildstæð stefna í orkumálum fyrir allt Ísland mótuð þar sem sérstök áhersla var lögð á græna orku í samgöngum.

Árangur í starfi

Að ógleymdu því að hrinda af stað hinu heimsþekkta átaki Inspired by Iceland sem hlaut verðlaun víða um heim og átti vafalaust þátt í að fjölga ferðamönnum. Hér eru aðeins fáein verkefni nefnd sem Katrín vann brautarfylgi í embætti iðnaðarráðherra.

Kata lætur verkin tala

Katrín hefur margoft talað fyrir því að stærsta jafnréttismálið sé að konum sé treyst til verka. Sem ráðherra sýndi hún þá hugsjón í verki og fékk hún sérstakt hrós frá umboðsmanni Alþingis fyrir að hafa tilnefnt fleiri konur en karla í nefndir, stjórnir og ráð á ráðherratíð sinni í Iðnaðarráðuneytinu.

Við erum sammála því að mikilvægt sé að konur skipi leiðandi stöður í íslensku samfélagi, við treystum Katrínu Júlíusdóttur og styðjum hana í 1. sætið í prófkjöri Samfylkingarinnar í kraganum nú um helgina.

Eva Margrét Kristinsdóttir, formaður Bjarts, Ungra jafnaðarmanna á Seltjarnarnesi.

Guðrún Jóna Jónsdóttir, fv. Formaður ungra jafnaðarmanna

Sigurþóra Bergsdóttir, varabæjarfulltrúi á Seltjarnarnesi

Heiða Björg Hilmisdóttir, varaformaður kvennahreyfingarinnar Samfylkingarinnar