Tveir mannanna frá Suðurnesjum

Tveir af sjómönnunum þremur sem eru taldir af eftir að togarinn Hallgrímur SI-77 fórst í Noregshafi í gærdag, eru frá Suðurnesjum. Ekki er hægt að greina frá nöfnum þeirra að svo stöddu. Þetta kemur fram á vef Víkurfrétta.

Það var skömmu fyrir hálf tvö í gærdag þegar Landhelgisgæslunni, bæði í Noregi og á Íslandi, barst neyðarkall frá skipinu. Sá sem lifði af horfði á eftir tveimur félögum sínum hverfa í hafið. Sá þriðji sem lést, komst í lekan flotgalla og er það líklega ástæðan fyrir því að hann drukknaði.

Sjómanninum var flogið til Álasunds í gær eftir að honum var bjargað. Hann fær svo áfallahjálp í dag. Mennirnir sem létust voru allir á sextugsaldri. Sá sem lifði var á fertugsaldri.