Aron: Er enn góður í hnénu

Aron Pálmarsson spilaði mikið með Íslandi í dag þrátt fyrir hnémeiðsli sín og er greinilega allur að koma til. Ísland vann í dag góðan sigur á Argentínu.

„Þetta er léttir. Klassíska svarið er að nú er fiðringurinn farinn úr manni eftir ágætan fyrsta leik hjá okkur," sagði Aron.

„Það vantaði þó ýmislegt upp á hjá okkur. Við vorum ekki nógu öflugir í sókninni í fyrri hálfleik og skoruðum aðallega úr hröðum upphlaupum í undirtölu. Við þurfum því aðeins að skoða það."

Strákarnir áttu erfitt uppdráttar í byrjun en lentu tvisvar í undirtölu þar sem þeir náðu að taka sig saman í andlitinu, jafna leikinn og svo komast yfir.

„Kannski erum við betur einbeitt í undirtölunni og tökum betur á mönnum einn á móti einum. Við ræddum í hálfleik að það vantaði upp á þetta hjá okkur og bættum það í seinni hálfleik. Ég hefði samt viljað stærri sigur."

Aron hefur verið frá vegna meiðsla að undanförnu en kenndi sér ekki meins í dag. „Ég hafði kannski ekki hugsað mér að spila svona mikið í þessum leik en það er auðvitað basl á Snorra og þá verður maður að gera sitt."

„Ég er samt ánægður með að hafa náð að spila svona mikið og vera enn góður í hnénu."