Selfyssingar fá Egil Jónsson á láni frá KR

Selfyssingar ætla greinilega að reyna styrkja lið sitt á meðan félagsskiptaglugginn er opinn en þeir hafa fengið tvo unga Íslendinga að láni til félagsins.

Egill Jónsson, leikmaður KR, mun leika með Selfoss út tímabilið í Pepsi-deild karla í knattspyrnu sem og Hafþór Þrastarson sem kemur einnig til liðsins á láni frá FH.

Egill Jónsson er sterkur miðjumaður og gæti styrkt Selfyssinga til muna fyrir komandi baráttu á botninum.

Hafþór Þrastarson ku vera varnarmaður og þarf liðið ekki síst að styrkja sig aftarlega á vellinum.

Báðir leikmenn verða gjaldgengir með Selfyssingum fyrir leikinn í kvöld gegn Val og spurning hvort þeir komi við sögu.