Snorri Steinn: Ég er enn mjög slæmur

Snorri Steinn Guðjónsson lék mjög vel með Íslandi í dag þrátt fyrir að vera að glíma við meiðsli. Hann átti sinn þátt í góðum sigri á Argentínu í dag.

„Ég er bara ánægður með sigurinn. Argentína er kannski ekki stórt blað í handboltaheiminum en erfiðir við að eiga," sagði Snorri Steinn eftir leikinn í dag.

Hann spilaði 20 mínútur leiksins og átti frábæra innkomu. Strákarnir sigldu endanlega fram úr Argentínumönnunum og tryggðu sér góðan sex marka sigur.

„Við áttum kannski að klára þetta í lok fyrri hálfleiks. Þá hefðum við þess vegna getað gert út um leikinn en þeir komu til baka. Þetta lið gefst aldrei upp - er skynsamt og spilar langar sóknir."

„Þetta var því finn sigur og stigin tvö allt sem skiptir máli."

Snorri Steinn hefur verið að glíma við sinaskeiðabólgu og er enn í miklu basli með meiðslin. „Mér líður ekki vel - langt frá því. Ég er því ekki eins glaður og hinir."

„Það var svo sem ekkert ákveðið hvað ég myndi spila mikið í dag. Maður þarf bara að taka einn dag fyrir í einu enda er alltaf eitthvað nýtt að koma til í þessu. Ég hef aldrei verið eins og veit aldrei við hverju ég á að búast. Það er það slæma í þessu."