Landsbankabónus í sjálfheldu

Algjör óvissa er um hvernig kaupréttarkerfi starfsmanna Landsbankans verður útfært. Rætt hefur verið um það innan Landsbankans að kaupréttirnir, sem nú eru nálægt því að vera þriggja milljarða króna virði, dreifist á alla starfsmenn bankans.

Hinn 15. desember 2009 var gert samkomulag á milli slitastjórnar Landsbanka Íslands hf. þ.e gamla bankans, fjármálaráðuneytisins fyrir hönd ríkissjóðs og Landsbankans um að hluti hlutabréfa í Landsbankanum sem slitastjórn gamla bankans heldur nú á, myndi stofn fyrir kaupaukakerfi sem næði til allra starfsmanna og kæmi til framkvæmda á löngum tíma.

Sá hlutur í Landsbankanum sem á að mynda stofn undir þetta kaupaukakerfi var orðinn eitt og hálft prósent af öllu hlutafé bankans um mitt þetta ár. Miðað við virði Landsbankans er verðmæti hlutarins um 3,2 milljarðar króna.

Stöð 2 hefur heimildir fyrir því að það hafi verið rætt innan bankaráðs Landsbankans að kaupaukakerfið dreifist á alla starfsmenn, en gengið var út frá því í fjármálaráðuneytinu á sínum tíma þegar skrifað var undir samkomulagið. Ef þessi hlutabréfeign myndi dreifast jafnt væru þetta hlutabréf sem eru þriggja milljóna króna virði á hvern einasta starfsmann, en um eitt þúsund vinna hjá Landsbankanum.

Heimildir fréttastofu herma að málið sé hins vegar í algjörri sjálfheldu í augnablikinu.

Í fyrsta lagi kemur fram í starfskjarastefnu bankans að tillögur að slíku kerfi og tilheyrandi breytingum á starfskjarastefnu skulu lagðar fyrir sérstakan hluthafafund. Fram að því sé bankaráði ekki heimilt að samþykkja slíkt kerfi.

Á hluthafafundi þyrfti fulltrúi stærsta hluthafans, eiganda 82 prósents hlutafjár, sem er ríkið, að greiða atkvæði með tillögunni.

Þá kemur fram í reglum Fjármálaeftirlitsins um kaupaukakerfi fjármálafyrirtækja að greiðslur vegna kaupréttar geti aldrei numið hærra hlutfalli en 25 prósentum af heildarlaunagreiðslum starfsmanns. Bara þetta ákvæði útilokar þá útfærslu að láta alla starfsmenn njóta góðs af kaupréttarkerfinu því 3 milljónir króna eru meira en fjórðungur af heildarlaunum meginþorra almennra starfsmanna.

Samkvæmt upplýsingum fréttastofu er málið í algjörri biðstöðu innan bankans og engin ákvörðun verið tekin um að leggja fyrir hlutahafafund breytingar á starfskjarastefnu bankans, en næsti aðalfundur bankans er í mars á næsta ári. Þá fengust þær upplýsingar hjá Bankasýslu ríkisins að stofnunin myndi ekki taka afstöðu til slíkrar tillögu nema hún yrði lögð fram og ekki lægi því fyrir hvort fulltrúar stofnunarinnar myndu styðja hana.