Aron: Fá lið eiga séns í okkur í þessum ham

Aron Pálmarsson átti eins og svo margir aðrir í íslenska liðinu frábæran dag þegar að strákarnir okkar fóru illa með Túnis á Ólympíuleiunum í morgun, 32-22.

Aron skoraði átta mörk og var markahæstur í íslenska liðinu. Fyrri hálfleikurinn var sérstaklega góður og gerðu strákarnir í raun út um hann þá.

„Við mættum mjög vel stemmdir í leikinn og það var kannski eitthvað sem okkur skorti í leiknum gegn Argentínu. Hvort það var vanmat eða eitthvað annað veit ég ekki. En við mættum svo sannarlega klárir í slaginn í dag og uppskárum eftir því," sagði Aron.

Ísland nýtti 19 af 22 skotum sínum í fyrri hálfleik og var því með skotnýtingu upp á 86%.

„Það eru ótrúlegar tölur. Þess fyrir utan voru þeir búnir að skora fjögur mörk þegar það voru 24 mínútur liðnar af leiknum. Flest okkar mörk komu úr hraðaupphlaupum sem segir okkur að vörn og markvarsla var í heimsklassa hjá okkur."

„Það eiga fá lið séns í okkur þegar við erum í þessum ham í vörninni eins og við vorum í fyrri hálfleik."