Hörður Sveinsson lánaður til Keflavíkur

Framherjinn Hörður Sveinsson spilar með Keflavík út tímabilið í Pepsi-deild karla í sumar. Fótbolti.net greinir frá þessu.

Hörður kemur á lánssamningi frá Valsmönnum en samningur hans við Hlíðarendafélagið rennur út í lok tímabils.

Zoran Daníel Ljubicic, þjálfari Keflavíkur, segir í samtali við Fótbolti.net alltaf gaman þegar góðir heimamenn snúa aftur heim.

Hörður, sem er 29 ára á árinu, lék með Keflavík upp yngri flokka félagsins. Hann steig sín fyrst spor með meistaraflokki félagsins árið 2001 en hélt árið 2006 til Danmerkur. Þar spilaði hann með Silkeborg áður en hann sneri aftur til Keflavíkur árið 2008.

Frá árinu 2010 hefur Hörður leikið með Valsmönnum en átt erfitt með að finna leiðina í markið. Hörður skoraði aðeins eitt mark í átján deildarleikjum á síðasta tímabili en hefur skorað þrjú mörk í ellefu deildar- og bikarleikjum á yfirstandandi leiktíð.

Keflavík mætir Stjörnunni í sjónvarpsleik miðvikudagskvöldið 8. ágúst.

Félagaskiptaglugganum á Íslandi verður lokað á miðnætti.