Barry Smith á leið í "verslunarleiðangur" til Íslands

Barry Smith, stjóri Dundee og fyrrum leikmaður Vals í Pepsi-deildinni, er á leiðinni til Íslands til þess að leita sér að framtíðarleikmönnum Dundee. Þetta kemur fram í skoska blaðinu The Courier.

Smith lék í þrjú ár með Val og blaðið segir hann enn vera vel tengdan inn í íslenska boltann. Smith hefur heyrt af mörgum efnilegum leikmönnum á Íslandi og hann ætlar sér að reyna að fá einhvern slíkan til skoska liðsins.

„Það er góð aðstaða á Íslandi, félög hafa marga æfingavelli, flest félög eru með eigið íþróttahús og það eru Knattspyrnuhallir í Reyjavík. Íslenskir knattspyrnumenn geta því æft yfir vetrartímann," segir Barry Smith.

„Ég held enn sambandi við fólk á Íslandi og ég ætla að fara þangað seinna í vikunni til þess að skoða leikmenn. 17 ára landsliðið er að gera góða hluti og þetta er tækifæri fyrir mig að skoða þessa stráka. Það væri gott að ná þeim snemma út. Það getur vel verið að það komi ekkert út úr þessu en það sakar ekki að reyna," sagði Smith.

Barry Smith lék með Val frá 2006 til 2008 og varð Íslandsmeistari með félaginu sumarið 2007.