NIB heldur topplánshæfiseinkunn sinni

Matsfyrirtækið Standard & Poor´s hefur staðfest topplánshæfiseinkunn eða AAA fyrir Norræna fjárfestingarbankann (NIB) með stöðugum horfum.

Í áliti matsfyrirtækisins segir að rekstur bankans sé mjög traustur og NIB eigi þar að auki öfluga bakhjarla, það er Norðurlöndin. Einkunnin endurspegli að Norðurlandaþjóðirnar, að vísu að Íslandi undanskildu, eru allar með topplánshæfiseinkunnir.

Við þetta má bæta að matsfyrirtækið Fitch Ratings segir í nýrri skýrslu að horfurnar séu stöðugar fyrir flesta banka á Norðurlöndunum á næsta ári. Fitch reiknar með að eignasafn þessara banka verði áfram traust og að fjárhagsstaða þeirra muni ekki bera skaða af þeirri efnahagsóvissu sem ríkir í Evrópu.