"Ekki boðlegt að búið sé að taka Alþingi Íslendinga í gíslingu"

Þingflokksformaður Samfylkingarinnar segir sjálfstæðismenn og framsóknarmenn halda þinginu í gíslingu vegna umræðu um þjóðatkvæðagreiðslu um nýja stjórnarskrá. Umræðan hefur nú staðið í tæpar 37 klukkustundir en sjálfstæðismenn segja að ekki sé um málþóf að ræða.

Þegar þingfundi á Alþingi lauk á miðnætti í gær höfðu umræður um tillögu um þjóðaratkvæðagreiðslu um nýja stjórnarskrá staðið í rúmar 35 klukkustundir, umræða hófst síðan aftur klukkan hálf ellefu í morgun og voru tólf á mælendaskrá nú fyrir fréttir og sér fyrir endann á umræðunni. Magnús Orri Schram er þingflokksformaður Samfylkingarinnar

„Já, ég vil nú bara segja að það er í raun og veru ekki boðlegt að það sé búið að taka alþingi Íslendinga í gíslingu. Hér er bara verið að tala um það að eiga samtal við þjóðina að rita nýja stjórnarskrá, það eru sex lykilatriði sem við teljum rétt að leita til þjóðarinnar með í ráðgefandi þjóðaratkvæðagreiðslu," segir Magnús Orri.

Ragnheiður Elín Árnadóttir þingflokksformaður Sjálfstæðisflokksins segir að ekki sé um málþóf að ræða heldur sé enn margt ósagt um þetta stórmál.

„Ef maður lítur til þingsögunnar þá er það til dæmis núverandi forsætisráðherra sem á metið þar, ein ræða tæpar 11 klukkustundir. Þessi umræða, bæði fyrri og síðari umræða, hefur staðið í 30 klukkustundir svo ég held að hún sé hvergi nærri að komast í hóp lengstu í þingsögunni," segir hún.

Samkvæmt þingskaparlögum hafa níu þingmenn rétt á því að leggja fram tillögu um að umræðu ljúki eftir ákveðið langan tíma og þannig sé hægt að stöðva málþóf. Magnús Orri kannast ekki við að þetta hafi verið rætt í þinginu í tengslum við þessa umræðu.

„Ég vona að til þess þurfi ekki að koma en það er ljóst að ég tel rétt að þingið, lýðræðislega kjörinn meirihluti, fái að skipa málum eins og þeir telji best. Og í þessu máli um þá getur farið svo á ákveðnum tímapunkti telji þingmenn það sé hyggilegast ef haldið verður áfram að taka þingið í gíslingu eins og við höfum upplifað hér undanfarna sólarhringa," segir