Bjartsýn á að umræðu ljúki fyrir jól - ekki yfir miklu að þumbast

Þingið hefur fengið skýr skilaboð um að auðlindir skuli í þjóðareign, segir formaður stjórnskipunar- og eftirlitsnefndar. Hún segir ekkert því til fyrirstöðu að ljúka fyrstu umræðu um breytingar á stjórnaskránni, fyrir jól.

Reiknað er með að sérfræðinganefnd sem fer yfir tillögur stjórnlagaráðs og niðurstöðu ráðgefandi atkvæðagreiðslu um tillögurnar, skili niðurstöðum sínum innan tveggja vikna til stjórnskipunar- og eftirlitsnefndar. Það er síðan sú nefnd sem leggur fram frumvarp um breytingar á stjórnarskránni.

Hvað er gert ráð fyrir að þetta taki langan tíma í meðförum Alþingis?

„Ég vona að við getum klárað fyrstu umræðu fyrir jól, og það á ekkert að vera því til fyrirstöðu. En við þurfum náttúrulega að athuga hvort við getum breikkað þá samstöðu sem er. Ef stjórnarandstaðan hefur einhver sérstök áhugamál þá tel ég rétt að við setjumst yfir það," segir Valgerður Bjarnadóttir, formaður stjórnskipunar- og eftirlitsnefndar Alþingis.

En er það ekki fullmikil bjartsýni að fyrstu umræðu verði hægt að ljúka fyrir jól?

„Nei, það er ekki bjartsýni því það er búið að vinna heilmikið í þessu, það er ljóst og ég sé nú ekki að það þurfi að ræða þetta í marga daga í fyrstu umræðu og ég er nú að vona það að það verði hægt að semja um það hvernig sú umræða fer fram. Ef menn vilja tala um það í þrjá daga þá tölum við um það í þrjá daga," segir Valgerður.

Hún segir stefnt á að ljúka þriðju og síðustu umræðu fyrir vorið þannig að almenningur geti kosið um nýja stjórnarskrá meðfram alþingiskosningum. Ekkert nema málþóf geti komið í veg fyrir það.

Meðal harðra deilumála sem greidd voru atkvæði um á laugardag var ákvæði um auðlindir í stjórnarskrá.

Það má búast við að það mæti harðri andstöðu að þessu verði breytt?

„Nei, það get ég ekki ímyndað mér, það er yfir 80% þjóðarinnar sem segja að þeir vilji að auðlindir sem ekki eru í einkaeigu verði í eigu þjóðarinnar, þannig að það eru nú mjög ákveðin skilaboð sem þingið fær þar. Ég get ekki séð að það sé hægt að þumbast mikið við því," svarar Valgerður að lokum.