Það er gaman að taka þátt

Íþróttaiðkun mín hófst á æfingum í frjálsum íþróttum hjá Íþróttafélagi Miklaholtshrepps (íM). Æfingarnar voru í boði einu sinni í viku yfir sumartímann á glæsilegum íþróttavelli við félagsheimilið Breiðablik. Þarna hittust allir krakkarnir í sveitinni og æfðu hlaup, stökk og köst.

Þessar æfingar stuðluðu því ekki síst að andlegri og félagslegri vellíðan margra þar sem félagslegum tengslum var komið á og margir eignuðust sína bestu vini.  Í lok sumars voru síðan haldin hreppamót og héraðsmót þar sem íþróttafélög víða af Snæfellsnesinu komu saman og kepptu sín á milli. Þó svo að ég hafi aldrei unnið neinar medalíur minnist ég þess hversu skemmtilegt var að fá að taka þátt á þessum stórmótum.

Um næstu helgi, 8. til 10. júní verður Landsmót UMFÍ 50+ haldið í Mosfellsbæ. Þó svo að ég eigi enn tæp 20 ár í að verða lögegur keppandi ætla ég samt sem áður að mæta og taka þátt í hátíðinni.

Á Landsmóti verður, frá morgni til kvölds, boðið uppá ýmsa skemmtilega viðburði sem eru öllum opnir. Til dæmis er tilvalið að byrja daginn á sundleikfimi, kynna sér svo golf eða kúluvarp og skella sér loks í zumba og línudans eða einhvern annan af fjölmörgum opnum viðburðum. Þeir sem hafa aldur til keppa svo að sjálfsögðu í sínum greinum á mótinu.

Heilsan spilar að sjálfsögðu stóran þátt á Landsmóti en Heilsuvin er einn af undirbúningsaðilum mótsins. Heilsuvin byggir á klasasamstarfi aðila í heilsutengdri þjónustu í Mosfellsbæ og er markmið félagsins að byggja upp og efla heilsutengda þjónustu.

Aðilar á vegum Heilsuvinjar verða á Landsmóti að kynna starfssemi sína og bjóða keppendum og öðrum gestum að prufa þjónustu sína. Heilsuvaktin mun bjóða uppá heilsufarsmælingar og Heilsu og hamingjulidnin mun bjóða herðanudd ásamt höfuðbeina- og spjaldhryggsjöfnun. Þá stendur Heilsuvin fyrir málþingi um heilsutengd málefni föstudaginn 8. Júní. Það ættu því allir að finna sér eitthvað skemmtilegt til að taka þátt í á Landsmóti 50+ í Mosfellsbæ.

Markmið mitt er að halda áfram að ástunda skemmtilega hreyfingu og heilbrigðan lífsstíl til þess að geta með sóma keppt á Landsmóti UMFÍ 50+ árið 2030. Þó svo að það eigi alveg örugglega eftir að verða rosalega gaman að taka þátt væri nú ekki leiðinlegt að fara heim með eins og eina medalíu.