Engin tilboð borist í Gylfa

Markus Babbel, knattspyrnustjóri Hoffenheim í Þýskalandi, segir að engin tilboð hafi enn sem komið er borist í landsliðsmanninn Gylfa Þór Sigurðsson. Gylfi er nú í láni hjá Swansea í ensku úrvalsdeildinni en þar hefur hann slegið í gegn. Hann er hins vegar samningsbundinn Hoffenheim til 2014.

„Staðreyndin er sú að Gylfi á að mæta aftur til félagsins þann 18. júní," sagði Babbel við þýska fjölmiðla. „Við höfum verið að ræðast við og hann sagði mér að hann vildi vera áfram í Englandi," bætti hann við en Gylfi hefur verið orðaður við fjöldamörg lið að undanförnu og ekki bara í Englandi. Lið á Spáni og Ítalíu eru einnig sögð hafa augastað á kappanum.

„Mér finnst Gylfi vera leikmaður í hæsta gæðaflokki og er hann hluti af mínum framtíðarplönum. Við höfum ekkert heyrt frá öðrum félögum og á meðan svo er á ég von á að hann verði áfram hjá okkur."