Aðeins hársbreidd frá stórslysi á Reykjanesbraut

Aðeins munaði hársbreidd, að sögn vitna, að stórslys yrði þegar jepplingur með fimm manns um borð á leið frá Keflavík, fór ofan í geilina á milli akbrautanna á Reykjanesbraut í Kúagerði í gærkvöldi, og valt upp á akbrautina fyrir umferð úr gagnstæðri átt.

Tveir bílar komu þar á móti og tókst ökumönnunum þeirra á síðustu stundu að afstýra árekstri þrátt fyrir glerhálku á vettvangi.

Kona í öðrum bílnum fékk lost en allir í jepplingnum, sem voru erlendir ferðamenn, sluppu ómeiddir.

Eins og fram hefur komið í fréttum okkar eru engin vegrið á milli akbrautanna, þar sem búið er að tvöfalda veginn, og stutt er síðan að ámóta atvik varð þar.