Vilja stytta námstíma til stúdentsprófs

Lagt er til að námstími til stúdentsprófs verði styttur um tvö ár og að gripið verði til sérstakra aðgerða strax í grunnskólum til að draga úr brotthvarfi framhaldsskólanemenda. Þetta kemur fram í niðurstöðu starfshóps um samþættingu mennta- og atvinnumála sem kynnt var í dag.

Hlutverk hópsins var meðal annars að móta aðgerðaráætlun sem sameinar áherslur í mennta- og atvinnustefnu stjórnvalda og finna leiðir til að auka vægi starfsnáms í íslensku menntakerfi.

Hópurinn, sem tók til starfa í september á síðasta ári, var skipaður fulltrúum úr skólasamfélaginu, ráðuneytum, samtökum atvinnurekenda og launamanna.

Tæpur þriðjungur Íslendinga á vinnumarkaði hefur ekki lokið námi á framhaldsskólastigi og er þetta hlutfall mun hærra en á hinum Norðurlöndunum. Brotthvarf er viðvarandi vandamál og námstími óvenju langur hér á landi.

Hópurinn vil bæta úr þessu meðal annars með því að stytta námstíma til stúdentsprófs um tvö ár.

„Við erum með óskilvirkt menntakerfi," segir Skúli Helgason, formaður starfshópsins. „Við erum með langan námstíma í íslenska skólakerfinu. Við teljum að við eigum að færa okkur nær því að námstíminn verði svipaður því sem hann er annars staðar þannig að nemendur geta verið að klára framhaldsskólann við 18 eða 19 ára aldur. Það mun losa um þá fjármuni sem við getum notað til að fjármagna ýmsar að þeim aðgerðum sem við leggjum til í þessu plaggi."

Hópurinn vill draga úr brotthvarfi með markvissum forvörnum í grunnskóla og leggja áherslu á einstaklingsmiðað nám. Auka samstarfs milli skóla og atvinnulífs og leggja meiri áherslu á tækni- og verkmenntun.

Þetta hefur ekki verið fjármagnað, kostnaðarmat liggur eiginlega ekki fyrir, hvernig ætlið þið að ná þessum markmiðum?

„Ég held að við sem samfélag verðum að átta okkur á því að meiri fjármunir verða að koma inn í menntamálin í framtíðinni. Ef við ætlum að byggja upp fjölbreytt atvinnulíf í framtíðinni þá gerist það ekki nema með því að styrkja menntamálin. Þau hafa kannski verið afgangsstærð of lengi og of oft í stjórnmálabaráttunni, það verður að breytast núna."