Sex sigrar í röð hjá Hlyni og Jakobi

Sundsvall Dragons hélt sigurgöngu sinni áfram í sænsku úrvalsdeildinni í körfubolta með því að vinna 16 stiga útisigur á 08 Stockholm Hr í kvöld. Bæði Íslendingaliðin eru í góðum gír í sænsku deildinni því Norrkoping Dolphins vann sinn fjórða leik í röð á sama tíma.

Jakob Sigurðarson skoraði 16 stig og Hlynur Bæringsson var með 15 stig og 11 fráköst þegar Sundsvall Dragons vann 100-84 útisigur á 08 Stockholm. Drekarnir eru í efsta deildarinnar ásamt Borås Basket.

Hlynur skoraði 11 af 15 stigum sínum í þriðja leikhlutanum sem Sundsvall vann 33-19 og gerði út um leikinn.

Pavel Ermolinskij var með 12 stig, 7 fráköst og 8 stoðsendingar þegar Norrköping Dolphins vann 82-65 útisigur á ecoÖrebro. Pavel var bæði með flest fráköst og flestar stoðsendingar hjá sínu liði.

Norrköping er búið að vinna fjóra leiki í röð og er komið alla leið upp í 3. til 4. sæti deildarinnar.