Bikarmeistarar KR settu met - fyrstir til að vinna fimm lið úr efstu deild

KR-ingar urðu í gær bikarmeistarar karla í fótbolta annað árið í röð þegar þeir unnu 2-1 sigur á Stjörnunni í úrslitaleik Borgunarbikarsins á Laugardalsvellinum. Ólafur Brynjar Halldórsson, tölfræði- og sagnfræðingur KR-inga, hefur fundið það út að KR-liðið setti með því nýtt met og skrifaði hann frétt um það inn á KR-síðuna.

KR-ingar lögðu fimm lið úr efstu deild á leið sinni að bikarmeistaratitlinum í ár en aldrei áður hefur félag á Íslandi unnið jafn mörg efstudeildarfélög í einni bikarkeppni.

KR vann ÍA 2-1 á útivelli í 32 liða úrslitum, Breiðablik 3-0 á KR-velli í 16 liða úrslitum, ÍBV 2-1 í Eyjum í átta liða úrslitum, Grindavík 1-0 á útivelli í undanúrslitum og Stjörnuna 2-1 í úrslitaleik á Laugardalsvelli.

Í fyrra vann KR fjögur félög úr efstu deild: Stjörnuna, FH, Keflavík og Þór Ak. auk þess að vinna BÍ/Bolungarvík úr 1. deild. Það er því ekki hægt að segja að vesturbæingar hafi farið auðveldu leiðina að þessum tveimur bikarmeistaratitlum.