Vill að tryggt verði að endurkröfur skuldara fyrnist ekki

Formaður efnahags- og viðskiptanefndar Alþingis segir að tryggja verði að endurkröfur skuldara á hendur bönkunum fyrnist ekki vegna óvissu sem hefur dregist á langinn í gengismálum. Þá verða bankarnir hvattir til að veita skuldurum aukið svigrúm.

Óvissa er enn uppi um hversu mikið fólk og fyrirtæki sem tóku gengistryggð lán skulda fjármálafyrirtækjum en leysa á úr flækjunni með 11 dómsmálum. Samkvæmt dekkstu sviðsmynd FME gætu bankarnir þurft að færa niður lán upp á 165 milljarða króna til viðbótar við það sem þeir hafa þegar fært niður.

Lögmennirnir Lúðvík Bergvinsson og Sigurvin Ólafsson birtu grein á Vísi í vikunni þar sem þeir vöktu athygli á þeirri ósanngjörnu stöðu að í dómsmálum um þessi lán réði úrslitum það tilviljanakennda orðalag sem hver og einn banki valdi þegar hann „dulbjó" samningana sem gengislán.

Heildarniðurstaðan af uppgjöri Hæstaréttar um þessi lán, sem þjóðin beið í ofvæni eftir, væri því sú að fyrir lántakendur væri það tilviljun háð hvort að lán þeirra teldust lögmæt eða ólögmæt.

Guðlaugur Þór Þórðarson, þingmaður og nefndarmaður í efnahags- og viðskiptanefnd óskaði eftir því að þeir Lúðvík og Sigurvin yrðu boðaðir á fund nefndarinnar á miðvikudag til að fara yfir málið. Helgi Hjörvar, formaður nefndarinnar varð við þessari ósk.

Finnst þér eðlilegt að innheimta lán þegar óvissa er um lögmæti þeirra?

„Þetta er auðvitað ákaflega sérstök aðstaða, þetta millibilsástand. Menn voru auðvitað að vona í vor að það tækist að fá fljótt og vel leyst úr helstu ágreiningsefnum fyrir dómstólum og að fjármálafyrirtækin myndu halda að sér höndum í aðgerðum meðan á því stæði. Ef að þessi mál eru að dragast mikið á langinn þá kallar það á endurmat á þessari stöðu og jafnvel á ákveðnar aðgerðir af hálfu stjórnvalda," segir Helgi Hjörvar.

En hvaða aðgerðir eru þetta? Helgi segir að annars vegar verði bankarnir hvattir til að gera samkomulag við skuldunauta sína um hóflegar afborganir, t.d fimm þúsund krónur af hverri milljón, eins og sumir þeirra hafi gert á sínum tíma.

„Hitt sem löggjafinn þarf að fara yfir áður en þingið kemur saman á ný er að tryggja að kröfur skuldara fyrnist ekki ef frekari dráttur verður á niðurstöðu í málinu. Við myndum þurfa að skoða í því sambandi lagarammann og athuga hvort gera þurfi nauðsynlegar breytingar á því," segir Helgi Hjörvar, formaður efnahags- og viðskiptanefndar Alþingis, en almennar fjárkröfur fyrnast á fjórum árum og flestar fjárkröfur fyrnast á þessum tíma. thorbjorn@stod2.is