Verð á fiskmörkuðum gaf nokkuð eftir á miðvikudag og fimmtudag. Lækkunin var óveruleg á miðvikudaginn en töluverð á fimmtudag.
Afli af strandveiðum í ágústmánuði var seldur á þessum tveimur dögum og höfðu strandveiðimenn af því áhyggjur að verð myndi hrapa vegna lokana um verslunarmannahelgina.
Verðið tók vissulega nokkra dýfu. Á fimmtudeginum lækkaði það um heil 26,6% og endaði í 259 kr/kg. Þegar litið er yfir dagana tvo var meðalverðið 299 kr/kg sem flestir strandveiðimenn telja viðunandi samkvæmt frétt Landssambands Smábátaeigenda.
Eyjólfur Þór Guðlaugsson, framkvæmdastjóri Reiknistofu fiskmarkaða, telur að lækkunin hafi ekki verið jafnmikil og menn óttuðust. „En okkur finnst þetta nú alveg nóg lækkun og seljendur eru ekkert ofsalega hressir skilst mér," segir hann. „Við vorum sammála um að á miðvikudaginn hafi þetta verið ásættanlegt en svo hrapaði þetta á fimmtudaginn um alveg hundrað kall."
Strandveiðimenn óskuðu eftir því að veiðunum í ágústmánuði yrði frestað fram yfir helgi. Það var ekki samþykkt og því urðu þeir að sætta sig við fyrirsjáanlega verðlækkun.
Fiskverð lækkaði um fjórðung í gær
