Indriði: SA vill færa „forréttindahópnum“ fyrir hrun stöðu sína aftur

„Tillögur SA miða að því að færa þeim sem nutu forréttinda í skattamálum í aðdraganda hrunsins þá stöðu aftur," segir Indriði H. Þorláksson, fyrrverandi ríkisskattstjóri og ráðuneytisstjóri í fjármálaráðuneytinu, og nú ráðgjafi stjórnvalda í skattamálum, í aðsendri grein í Fréttablaðinu í dag.

Þar rekur Indriði tillögur Samtaka atvinnulífsins í skattamálum, en hann segir að þær feli í sér 30 milljarða króna lækkun á sköttum.

„Framangreindar tillögur SA fela í sér 30 ma. kr. lækkun á sköttum. Yfir 20 ma. kr. rynnu til þeirra 5% skattgreiðenda sem hæstar tekjur hafa og allt að 27 mia. kr. til um 30% tekjuhæstu skattgreiðenda. Þeir 3 ma. kr., sem eftir eru myndu deilast á þá sem eftir eru," segir í grein Indriða, sem ber fyrirsögnina Skrautblóm SA.

Indriði segir að skattar nú séu lægri en á árunum fyrir hrun, sé mið tekið af algengustu alþjóðlegu mælikvörðum.

Orðrétt segir í grein Indriða:

„Á föstu verðlagi 2013 voru skattar á árunum 2005-2007 að meðaltali 595 ma. kr. og 557 ma. kr. á árinu 2008. Fjárlagafrumvarpið 2013, með hækkun vegna sveitarfélaga, gerir ráð fyrir 520 ma. kr. Þannig vantar um 37 ma. kr. á að skattar 2013 verði eins háir og þeir voru 2008 og það vantar 75 ma. kr. upp á að þeir nái meðaltali bóluáranna 2005 til 2007.

- Tekjustofnar drógust saman við hrunið og skatttekjur minnkuðu þess vegna. Sá samdráttur kom líka fram í þeim tekjum sem til skipta voru. VLF á föstu verðlagi var svipuð á árunum 2005 og 2010 en skattar voru til muna lægri síðara árið. Sama á við um árin 2007 og 2013.

- Á árunum 2005 til 2007 voru skattar að meðaltali 32,1% af VLF. Á árinu 2008 var hlutfallið 28% og verður 28,1% á árinu 2013. Sá hluti landsframleiðslu sem fer til sameiginlegra verkefna með sköttum er nær óbreyttur milli 2008 og 2013 en hlutfallið er fjórum prósentustigum lægra 2013 en það var 2005 til 2007. Tæki ríkið eins mikið til sín og þá þyrftu skattar 2013 að vera um 70 ma. kr., hærri en gert er ráð fyrir í fjárlagafrumvarpinu."

Sjá má grein Indriða hér.