Þokkaleg kosning hjá Samfylkingunni

Um átján hundruð Samfylkingarmenn hafa kosið í prófkjöri flokksins í Suðvesturkjördæmi í dag en kjörstöðum þar verður lokað klukkan fimm. Þá höfðu 700 tekið þátt í prófkjöri Samfylkingarinnar í Norðausturkjördæmi sem þykir þokkalega gott en kjörstöðum þar verður lokað klukkan sex. Þess má geta að kosningin var rafræn auk þess sem hægt var að fara á kjörstaði til þess að kjósa eftir gamla laginu.

Þá er einnig prófkjör hjá Sjálfstæðisflokknum í Suðvesturkjördæmi. Þar voru engar upplýsingar um kjörsókn en að sögn Jónasar Þórs Guðmundssonar, formanns kjörstjórnar Sjálfstæðisflokksins í Suðvesturkjördæmi, þá var kjörsókn farin að glæðast eftir að hún fór afar rólega af stað í morgun.

Stefnt er á að tilkynna fyrstu tölur Samfylkingarinnar klukkan sjö. Einnig verða niðurstöður úr prófkjöri Sjálfstæðisflokksins kynntar klukkan sjö, en þær verða lesnar í heyranda hljóði í Valhöll.