Hefði viljað meiri stuðning

Bjarni Benediktsson fékk tæplega 54 prósent greiddra atkvæða í fyrsta sætið í prófkjöri flokksins í Suðvesturkjördæmi. Hann segist hafa verið að vonast eftir meira afgerandi stuðningi.

Bjarni Benediktsson fékk 8 prósentustigum meira í oddvitasætið í prófkjöri í Kraganum fyrir kosningarnar 2009 en þá fékk hann 62 prósent en 53,8 prósent núna. Þetta er einn lakasti árangur sem formaður hefur fengið í prófkjöri hjá Sjálfstæðisflokknum en fyrir 33 árum fékk Geir Hallgrímsson, þáverandi formaður flokksins, ekki nema 37,5 prósent atkvæða í oddvitasætið í Reykjavík, án þess að það hefði neinar afleiðingar fyrir hann.

Bjarni segist hafa búist við meiri stuðningi.

„Ég neita því ekki að ég hefði gjarnan vilja sjá meiri stuðning, en þetta var afgerandi niðurstaða," sagði Bjarni. Hann segir niðurstöðuna ekki breyta neinu varðandi sína stöðu, honum finnst mestu máli skipta að Sjálfstæðisflokkurinn sé að bjóða upp á sterkan lista. Hann segir að það hafi einnig verið sótt hart að honum, en hann fékk tvö mótframboð.

Ragnheiður Ríkharðsdóttir lenti í öðru sæti í prófkjörinu í gær með 2153 atkvæði í annað til þriðja sæti og Jón Gunnarsson þingmaður hafnaði í þriðja sæti með 2267 atkvæði.

Stóru tíðindin eru ef til vill góður árangur Vilhjálms Bjarnasonar háskólakennara og formanns félags fjárfesta en hann hlaut 2378 atkvæði í 1.-4. sæti og hafnaði fjórða sæti. Elín Hirst hafnaði í 5. sæti og Óli Björn Kárason í því sjötta. Miðað við skoðanakannanir ættu fimm efstu sætin að vera örugg þingsæti.