Talsverður viðbúnaður vegna elds í þaki iðnaðarhúsnæðis

Talsverður viðbúnaður var hjá slökkviliðinu á höfuðborgarsvæðinu upp úr hádegi í dag þegar tilkynning barst um eld í klæðningu á þaki iðnaðarhúsnæðis á Köllunarklettsvegi nærri Holtagörðum í dag.

Þar höfðu iðnaðarmenn verið að bræða þakpappa með eldi sem barst svo í klæðningu fyrir slysni.

Þegar á vettvang var komið kom í ljós að minni hætta var á ferð en í upphafi var talið. Það gekk vel að ráða niðurlögum eldsins að sögn varðstjóra slökkviliðsins. Að öðru leytinu til var dagurinn rólegur hjá slökkviliði höfuðborgarsvæðisins.