Nálgunarbann: Hótar að smita fyrrverandi kærustu af alnæmi

Hæstiréttur Íslands staðfesti í dag nálgunarbann gegn karlmanni sem hefur verið að ofsækja fyrrverandi kærustu sína vegna ótilgreindrar skuldar sem hann telur hana skulda sér.

Meðal gagna sem lögð voru fyrir dómara Héraðsdóms Reykjavíkur voru eftirfarandi hótanir sem bárust vinkonu hennar í gegnum Facebook:

- „ég mun ekki fara úr þessum heimi fyrr en ég er kominn með peninginn eða ég er búinn að kyrkja hana til dauða og hengja mig svo strax"

- „er oft með óhreinar nálar á mér væri ekki gaman fyrir hana að fá eina óvart í sig".

- „ég skal lofa uppá líf mitt mömmu minnar kisu og fósturpabba sem mér þykir mest vænt um að rétt áður en ég mun kveðja frá þessum blessaða heimi að ég mun taka hana með mér í gröfina eða aids sem er verra"

- „komin 2 ár núna...ekki heldur hún að ég sé að fara að gefa mig? Hún á ekki eftir að nenna að búa á þessu landi lengur"

Manninum er gert að sæta nálgunarbanni í hálft ár, honum er einnig bannað að nálgast heimili hennar og vinnustað á svæði sem afmarkast við 50 metra radíus umhverfis staðina. Þá er honum einnig óheimilt að veita konunni eftirför, nálgast hana á almannafæri eða setja sig með öðrum hætti í beint samband við hana.