Hátt í þrír milljarðar í vinnumarkaðsúrræði

Ríkisstjórnin samþykkti í gær tillögu Guðbjarts Hannessonar velferðarráðherra um verkefnið Vinna og virkni - átak til atvinnu 2013. Atvinnuleysistryggingasjóður leggur 2,7 milljarða króna til að standa straum af hluta kostnaðar við rúmlega 3000 vinnumarkaðsúrræði fyrir atvinnuleitendur sem hafa fullnýtt eða munu á næstunni fullnýta rétt sinn til atvinnuleysisbóta.

Í kjölfar efnahagshrunsins var réttur til atvinnuleysisbóta framlengdur tímabundið úr þremur árum í fjögur. Um áramótin verður hann aftur þrjú ár og er reiknað með að á tímabilinu 1. september 2012 - ársloka 2013 hafi um 3.700 atvinnuleitendur fullnýtt rétt sinn innan atvinnuleysistryggingakerfisins.

Guðbjartur Hannesson velferðarráðherra segir á vef ráðuneytisins að verkefnið sem hér hafi náðst samkomulag um að ráðast í til að tryggja vinnu og virkni atvinnuleitenda sé enn eitt dæmið um það hvernig ríki, sveitarfélög og aðilar vinnumarkaðarins geti lyft grettistaki þegar allir eru sammála um verkefnið og tilgang þess.