Stjarnan í átta liða úrslit eftir sigur á Blikum

Kvennalið Stjörnunnar er komið í átta liða úrslit Powerade-bikars kvenna eftir fimm stiga heimasigur á Breiðabliki, 72-67.

Garðbæingar byrjuðu leikinn mun betur og leiddu að loknum fyrsta fjórðungi 21-9. Þá tóku gestirnir við sér, jöfnuðu metin og var leikurinn í járnum allt til loka. Stjörnukonur reyndust sterkari á endasprettinum og tryggðu sér sigur og sæti í átta liða úrslitum keppninnar.

Bryndís Hanna Hreinsdóttir skoraði 21 stig fyrir Stjörnuna og Kristín Fjóla Reynisdóttir kom næst með 16 stig. Hjá gestunum skoraði Aníta Rún Árnadóttir mest eða 16 stig.

Stjarnan er annað liðið til að tryggja sér sæti í 8-liða úrslitum keppninnar. Snæfell gerði slíkt hið sama á föstudagskvöldið með sigri á Fjölni.

Síðar í dag mætast Haukar og Keflavík í Hafnarfirði auk þess sem Valur tekur á móti Njarðvík.