Ævisparnaðurinn í hættu: Greinilega mjög alvarlegt mál

„Mín skoðun er sú að þetta eigi ekki að bitna að neinu leyti á þjónustu við íbúana á hjúkrunarheimilinu," segir Jóna Valgerður Kristjánsdóttir, formaður Landssambands eldri borgara um þá grafalvarlegu stöðu sem er komin upp í hjúkrunarheimilinu Eir.

Heimilið er tæknilega gjaldþrota með skuldir upp á átta milljarða og neikvætt eigið fé. Ástæðan er aðallega sú að lán hafa snarhækkað eftir kostnaðarsamar byggingarframkvæmdir eftir hrun og tekjur ekki staðist væntingar.

Til þess að auka á alvarleika málsins þá er sagt að bágri fjárhagsstöðu Eirar hafi verið leynt fyrir stjórn félagsins af núverandi formanni, Vilhjálmi Þ. Vilhjálmssyni, fyrrverandi borgarstjóra.

„Þetta er greinilega mjög alvarlegt mál," segir Jóna Valgerður. „Málið er stórt og erfitt og virðist hafa grasserað lengi," bætir hún við.

Jóna Valgerður segir að fyrirkomulag hjúkrunarheimilisins þurfi að skoða betur, bæði út frá reglugerðum og lögum. Ævisparnaður íbúa Eirar er nefnilega undir fari félagið í þrot. Alls hafa íbúarnir lagt tvo milljarða í Eir í gegnum íbúðarétt en félagið á 207 íbúðir. Engin veð eru fyrir inneignum þeirra og því óvíst hvort þeir fái peningana sína til baka ef að Eir verður gjaldþrota.

Þrjár endurgreiðslur eru þegar gjaldfallnar og er verið að leita eftir því við íbúðaréttarhafa að fá frest á endurgreiðslu á meðan leitað er leiða til þess að leysa vanda Eirar.

Fréttastofa Stöðvar 2 ræddi við hjónin Sigurð og Maríu fyrr í vikunni. Þau fluttu inn í 60 fermetra öryggisíbúð sem hjúkrunarheimilið Eir á í Hlíðarhúsum í Grafarvogi fyrir fjórum árum síðan. Þau létu nær allt sitt fé í staðinn fyrir íbúðarétt í húsinu. Peningana áttu þau svo að fá til baka þegar þau færu aftur úr íbúðinni. Nú er það í uppnámi.

„Þeir eru að taka þarna peninga af okkur ef þetta er að hverfa," sagði Sigurður Hólm Guðmundsson, sem er um áttrætt, í viðtalinu.

Jóna Valgerður segir það nauðsynlegt að fundin verið lausn á þessu máli. „Að það verði komið í veg fyrir að þetta fólk tapi sparnaðinum sínum," bætir Jóna Valgerður við. Hún bendir á að eldri borgarar hafi tapað gríðarlega miklum fjármunum á hruninu, „þeir voru margir sem töldu að hlutabréfamarkaðurinn væri öruggur hér á landi," segir hún.

Stöð 2 hafði það eftir heimildum í fréttum sínum í gærkvöldi að málið verði eðlilega tekið fyrir á stjórnarfundi hjúkrunarheimilisins en þar verði einnig farið fram á að Vilhjálmur víki úr stjórninni. Sjálfur hefur hann beðist undan viðtölum alla vikuna.