Kjörsókn jókst þegar leið á daginn

Landsmenn gengu að kjörborðinu í dag í ráðgefandi þjóðaratkvæðagreiðslu um tillögur stjórnlagaráðs að nýrri stjórnarskrá. Þáttakan hefur verið í dræmara lagi en þó virðist hún verða ívið meiri en í kosningum til stjórnlagaþings.

Kjörsókn fór afar rólega af stað í flestum kjördæmum landsins í morgun en jókst þó aðeins er líða tók á daginn. Kjörstaðir eru opnir til 10 í kvöld.

Nú rétt fyrir fréttir höfðu 32,14% tekið þátt í Reykjavík Suður, 30,99% í Reykjavík Norður, 32% í Suðvesturkjördæmi, 24,9% í Suðurkjördæmi klukkan fimm. Ekki höfðu verið teknar saman tölur fyrir Norðvesturkjördæmi í heild sinni og sömu sögu er að segja úr Norðausturkjördæmi.

Sveinn Sveinsson formaður yfirkjörstjórnar í Reykjavík suður sagði að atkvæðagreiðslan hefði gengið fyrir sig þegar við hittum hann um fjögurleytið í dag.

„Það hefur gengið vel, þetta er rólegt en heldur meira heldur en var í stjórnlagaráðskosningunum. Ekki mikil kjörsókn þannig séð," segir hann.

Eiríkur Bergmann Einarsson stjórnmálafræðingur og meðlimur í stjórnlagaráði segir kjörsóknina vera í takt við væntingar.

„Eina viðmiðið sem við höfum er stjórnlagaþingkosningarnar, þessar byrjuðu heldur dræmt en það virðist vera stígandi í þessu," segir hann.

Að mati Eiríks er lítið hægt að horfa í það hve margir sátu heima.

"Það eina sem felst í heimasetunni er það að maður felur öðrum að ráða," segir hann.

Nokkuð flóknara er að telja atkvæðin í þessum kosningum þar sem um sex spurningar er að ræða. En hvenær má þá búast við fyrstu tölum að mati Sveins?

„Það verður aldrei fyrr en uppúr ellefu, ellefu hálft tólf, og þá bara við fyrstu spurningunni," segir hann.

Í Reykjavíkurkjördæmunum báðum verður farin sú leið að telja eina spurningu í einu en sumstaðar annarsstaðar verða allar spurningar á hverjum seðli taldar í einu.

Kjósendur sem við ræddum við í dag voru sammála um að mikilvægt sé að mæta á kjörstað.