Með eljusemi má útrýma kynbundnum launamun

Kyndbundinn launamunur er hvorki til staðar í Reykjanesbæ né á Akureyri. Bæði sveitarfélögin birtu upplýsingar um þetta á heimasíðum sínum í dag en fyrr í vikunni kom hins vegar fram að rúmlega 13% óútskýrður kynbundinn launamunur hjá starfsmönnum BSRB mælist á landinu.

Allherjarkönnun sem unnin var árið 2007 en kynnt í bæjarráði Akureyrar í gær leiðir í ljós að ekki er marktækur kynbundinn munur á launum karla og kvenna í bæjarfélaginu, hvorki þegar um er að ræða dagvinnulaun né heildarlaun.

Árið 1998 var svipuð könnun gerð sem benti til að kynbundinn launamunur væri 6-8% í bæjarfélaginu. Eftir það var ráðist í gagngera endurskoðun á launakerfi Akureyrarbæjar og unnið markvisst að því að jafna laun kynjanna. Mikil vinna og erfiðar ákvarðanir leiddu til þeirrar niðurstöðu sem nýja könnunin sýnir. „Það virðist því ljóst að með góðum vilja, mikilli vinnu og eljusemi er hægt að eyða kynbundnum launamun," segir á heimasíðu Akureyrarbæjar.

Sömu sögu er að segja úr Reykjanesbæ. Þar hefur markvisst verið unnið að því að útrýma kynbundnum launamun samkvæmt upplýsingum frá starfsþróunarstjóra. Fyrir vikið er „hlutfall karla og kvenna í æðstu stjórnunarstöðum jafnt" og kynbundinn launamunur fyrirfinnst ekki „hvort sem er í grunnskólum, leikskólum, íþróttahúsum, félagsþjónustu eða annars staðar".