Eina vandamál Íslands er fámennið

Eina vandamálið fyrir Ísland í framtíðinni er að íbúar landsins mættu vera fleiri. Innviðirnir eru sterkir og efnahagsleg tækifæri í framtíðinni mörg. Þetta segir fjármálasérfræðingurinn og pistlahöfundurinn John Dizard, en hann hélt erindi á hádegisfundi VÍB í Hörpunni í vikunni.

Dizard er einna þekktastur fyrir skörp skrif sín í viðskiptatímarit, þar á meðal Financial Times. Í erindi sínu í Hörpunni í gær, ræddi Dizard um stöðu mála í Evrópu, bæði út frá efnahagslegu sjónarmiði en ekki síður pólitísku.

Sagði hann vanda við stjórnun efnahagsmála í Evrópu, blasa við, ekki síst þar sem ólík ríki notist við sömu myntina, evruna, og þurfi ólík meðöl við vandamálum sínum. Hann spáir þó ekki allsherjarhruni evrunnar, heldur frekar sársaukafullri aðlögun Evrópusambandsins að breyttum veruleika.

„Ég held að norðurevrópsku löndunum muni vegna betur efnahagslega en undanfarið og að mismunurinn muni jafnvel aukast, að hluta til vegna þess að faglært og metnaðarfult fólk leiti frá Suður-Evrópu til Norður-Evrópu," segir Dizard.

Þegar kemur að Íslandi segist Dizard bjartsýnn fyrir hönd landsins, ekki síst vegna þess að hér væri rík og sterk lýðræðishefð, og sterkir efnahagslegir innviðir.

„Ég held að Ísland búi yfir miklum styrk sem Íslendingar vanmeta stundum sjálfir. Þið búið við lágan orkukostnað, nægt vatn, sem ykkur finnst sjálfsagt en sem er mjög eftirsótt annars staðar í heiminum, með mjög ódýrt prótín og mjög skilvirkan iðnað, og þið hafið mikið af framsýnu og duglegu fólki," segir Dizard.

Og Dizard segir vandamál Íslendinga ekki voru svo umfangsmikil, þegar öllu sé á botninn hvolft.

„Eina vandamálið á Íslandi er að það er ekki nóg af Íslendingum en þið eruð að vinna í því," segir hann.