Telur að um tímamótasamning sé að ræða

Drögin að samningunum við Huang Nubo sem liggja fyrir eru að mörgu leyti tímamótasamningar að mati Bergs Elíasar Ágústssonar, bæjarstjóra í Norðurþingi. Þar skuldbindur kínverski auðmaðurinn sig með afdráttarlausum hætti til að hlúa að náttúrunni og byggja upp ferðaþjónustu á svæðinu, sem aðrir mættu taka sér til fyrirmyndar að sögn bæjarstjórans.

Í samningsdrögunum segir orðrétt: „Zhongkun [fyrirtæki Nubo] hyggst markaðssetja svæðið sem áfangastað erlendra ferðamanna með áherslu útivist, náttúruskoðun, ráðstefnur og menningu. Zhongkun mun stuðla að viðhaldi lífríkis, frekari uppgræðslu lands með það að markmiði að styðja við og efla náttúrulega þróun lífríkis þess."

Bergur telur þessi samningsákvæði til mikillar fyrirmyndar, enda teljast náttúruvernd og ferðamennska til jákvæðra fyrirbæra hér á landi. Hann sér ekki að Nubo vilji eða geti farið fram hjá þessum samningsákvæðum. „Hér er aðili sem er tilbúinn til að leggja ýmislegt á sig til að styðja við og efla náttúrulega þróun lífríkis. Það væru ansi mörg ferðaþjónustufyrirtæki sem gætu tekið sér þetta til fyrirmyndar," segir hann.

Samningsdrögin eru ekki fullbúin, en þau eru langt komin. Auk þess bíða þau umsagnar sérstakrar ráðherranefndar sem var skipuð til að fara yfir samningana. Bergur veit reyndar ekki nákvæmlega hvaða stjórnsýslulegu stöðu sú nefnd hefur en vill þó gera þetta í samstöðu við nefndina. „Við viljum gera þetta í takt við stjórnvöld," segir Bergur.

Hann vonast til að niðurstaða fáist í málið á næstu dögum.

Erlend frétt uppspuni

Í erlendum fjölmiðlum birtist frétt í dag þar sem fullyrt er að Nubo hafi þegar náð samkomulagi við íslensku ríkisstjórnina um 99 ára leigusamning um jörðina Grímsstaði á fjöllum. Leiguverðið er sagt sex milljónir dollara og fullyrt að fulltrúar ríkisstjórnarinnar séu á leiðinni til Beijing í þessum mánuði til að skrifa undir samningana.

Bergur Elías segir að þessi fréttaflutningur sé ekki sannleikanum samkvæmur. Í fyrsta lagi sé Nubo ekki beinlínis í samningaviðræðum við ríkisstjórnina. Í öðru lagi sé 99 ára leiga ekki í spilunum. Þá liggi endanlegir samningar ekki fyrir og engir fulltrúar ríkisstjórnarinnar séu á leið út til að skrifa undir.

Í fréttinni er einnig fullyrt að Ólafur Ragnar Grímsson, forseti Íslands, hafi hvatt Nubo til að fjárfesta á Íslandi. Hvort það er sannleikanum samkvæmt skal ósagt látið.