Fimm milljarða munur á vaxtakjörum Íslands og Írlands

Vaxtakostnaður sem safnast á ríkissjóð vegna lána frá Norðurlöndunum eftir hrunið nemur tæpum átta milljörðum króna á hverju ári. Ef ríkissjóður Íslands fengi lánakjörin sem Norðurlöndin bjóða Írum, væri vaxtakostnaður tæplega fimm milljörðum lægri árlega.

Ríkissjóður Íslands fékk lán eftir hrun fjármálakerfisins frá Norðurlöndunum, en staða ríkissjóðs á þeim tíma eftir hrunið var afar erfið.

Lánin voru veitt í tengslum við endurreisnaráætlun Íslands og Alþjóðagjaldeyrissjóðsins.

Eins og greint var frá í fréttum okkar í gær, hefur Helgi Hjörvar, þingmaður Samfylkingarinnar og formaður Íslandsdeildar Norðurlandaráðs, óskað eftir skýringum á því frá ríkisstjórnum Norðurlandanna hvers vegna vextir á lánunum hingað til lands voru hærri heldur en á lánum frá Norðurlöndunum til Íra. Þar munar 1,75 prósentustigi, en vaxtaálagið á skuldir Íslands nemur 2,75 prósentum á meðan það nemur einu prósenti á skuldir Íra.

Heildarlánin til Íslands frá Norðurlöndunum námu 1.775 milljónum evra, eða ríflega 280 milljörðum króna á núverandi gengi.

Sé mið tekið af þeirri upphæð er árlegur vaxtakostnaður 7,7 milljarðar króna.

Ef við hefðum notið vaxtana sem Írar fá á sín lán, þá væri árlegur kostnaður 2,8 milljarðar.

Munurinn á vaxtakjörunum nemur því tæpum fimm milljörðum króna.

Ríkissjóður hefur nú þegar greitt til baka tæplega 60 prósent af lánunum frá Norðurlöndunum, en samkvæmt samningi voru þau afborgunarlaus fyrstu fimm árin eða fram til 2014. Nú hafa allir gjalddagar af láninu fram til 2019 verið greiddir.

Það sparast þó ekki miklir peningar þannig, þar sem ný lán voru tekin til þess að greiða þessi til baka, en ávinningurinn í því felst í að opna leiðina að nýju, inn á alþjóðafjármálamarkaði, þangað sem hið nýja lánsfé var sótt.