Tálbeita á Reykjavíkurflugvelli?

Tvennum sögum fer af því hvort það hafi í raun og veru verið Lady Gaga sem lenti á Reykjavíkurflugvelli um sjöleytið í kvöld, eða hvort um eftirhermu hafi verið að ræða. Um kvöldmatarleytið lenti vél með ungri konu sem er nauðalík Lady Gaga.

Eftir að vélin lenti bárust Vísi upplýsingar um að þarna væri á ferðinni tálbeita, sem send hefði verið til að villa um fyrir fjölmiðlamönnum. Hvað sem því líður er ljóst að Lady Gaga mun mæta í Hörpuna eftir hádegi á morgun til þess að veita verðlaun úr Lennon/Ono sjóðnum.

Andrea Jóhannsdóttir mikill aðdáandi Gaga var stödd á vellinum til að bíða komu Gaga og hún var hreint ekki viss um hvort þetta hefði verið stórstjarnan eða ekki. "Ég er náttúrlega svaka fan og þekki aðstoðarkonuna hennar og veit hvernig aðstoðarfólkið hennar lítur út. Ég sá enga af þeim," segir hún. Stúlkan sem steig út úr vélinni hafi þó verið nauðalík Gaga.

Andrea er nýkomin frá London, þar sem hún horfði á sína konu halda tónleika. "Ég fór til London á tvenna tónleika, segir hún en báðir tónleikarnir fóru fram í september," segir Andrea.

Eins og fram hefur komið er Lady Gaga komin hingað til lands til að taka á móti friðarverðlaunum úr Lennon/Ono sjóðnum. Athöfnin mun fara fram í Hörpu á morgun en auk Lady Gaga munu fjórir aðrir taka við verðlaununum.

Þeirra á meðal er eiginmaður einnar úr rússnesku pönkhljómsveitinni Pussy Riot og foreldrar Rachel Corrie, sem lést þegar hún varð fyrir skriðdreka í Palestínu.