SA segja ríkisstjórnina ögra fyrirtækjum og svíkja loforð

Fjárlagafrumvarpið fyrir árið 2013 sem kynnt var í dag er ögrun við fyrirtækin í landinu og starfsfólk þeirra, segja Samtök atvinnulífsins. Á vef samtakanna segir að ætlunin sé að hækka tryggingagjald þannig að fyrirtækin fá ekki að njóta lækkaðra útgjalda til atvinnuleysistrygginga eins og gert hafi verið ráð fyrir við gerð kjarasamninga vorið 2011. Þannig sé ráðist að forsendum kjarasamninga og möguleikum fyrirtækjanna að standa við þá án þess að hækka verðlag. Skýrt kom fram þegar samningarnir voru kynntir að gert var ráð fyrir að tryggingargjaldið yrði lækkað í takt við minnkandi atvinnuleysi. Við fyrstu sýn virðist sem lækkunin ætti að nema a.m.k. 0,5% 2013.

Þá segir að fyrirvaralaus þreföldun virðisaukaskatts á gistiþjónustu muni kollvarpa áætlunum ferðaþjónustunnar fyrir næsta ár. Viðskipti við erlend ferðaþjónustufyrirtæki séu sett í uppnám og greininni gert erfitt fyrir að standa undir þeirri fjárfestingu sem ráðist var í, í kjölfar markaðsátaks erlendis sem stutt var af stjórnvöldum. Hækkun vörugjalda á bílaleigubíla sé önnur alvarleg atlaga að ferðaþjónustunni.

Þá segja Samtök atvinnulífsins að síhækkandi álögur á fjármálafyrirtæki, nú í formi sérstaks viðbótarþreps í fjársýsluskatti, bitni fyrst og fremst á viðskiptavinum þeirra með hærri vöxtum og þjónustugjöldum og séu ekki til þess fallnar að örva fjárfestingar, fjölga störfum og stækka skattstofna sem ætti að vera megin viðfangsefni og markmið stjórnvalda.

Þá segir að atvinnulífið hafi ekki átt von á því að einföldun á álagningu vörugjalda á matvæli myndi leiða til 800 milljóna króna skattahækkunar eins og frumvarpið gerir ráð fyrir. Þessi hækkun muni koma beint fram í hækkuðu vöruverði.