Dæmdir menn krefjast aðgerða gegn Íslendingum

Friðrik Arngrímsson framkvæmdastjóri LÍÚ segir að það séu dæmdir menn sem helst krefjist aðgerða gegn Íslendingum vegna makrílveiðanna. Hér á hann við Skota og Íra sem hafa verið einn stórtækastir í ólöglegum veiðum á makríl og hlotið háar sektir fyrir. Þetta kemur fram á vefsíðu LÍÚ þar sem fjallað er um málið.

„Það eina sem Evrópusambandinu er heimilt að gera er að beita löndunarbanni á íslensk fiskiskip sem eru á makrílveiðum en allar aðgerðir umfram þær, s.s. innflutningsbann eða slíkt er skýrt brot gegn EES-samningnum, segir Friðrik Arngrímsson á vefsíðunni.

Nokkur umræða hefur verið um samþykktina í fjölmiðlum síðasta sólarhring og hafa fallið mörg stór orð um hversu víðtækar aðgerðir ESB kunna að verða.

Tilskipunin sem Evrópuþingið samþykkti er almenns eðlis og beinist því ekki eingöngu gegn Íslendingum, heldur öllum ríkjum sem talin eru stunda ofveiði á sameiginlegum fiskistofnum. Þá tekur hún eingöngu til þeirra tegunda sem talið er að séu ofveiddar og annars afla sem veiddur er í sömu veiðiferð. Því er ekki hægt að halda því fram að innflutningsbann verði sett á allar íslenskar sjávarafurðir á grundvelli þessarar tilskipunnar.

„Þá er fráleitt að tala um að Íslendingar stundi ofveiði þar sem Norðmenn og ESB sem veiða 90% af ráðlögðum kvóta. Ísland á allan rétt til veiða á stofnum innan íslensku lögsögunnar. Við höfum ítrekað lagt fram tillögur um að allir dragi úr veiðum svo ekki verði veitt umfram ráðgjöf. En þá þurfum við auðvitað að fá sanngjarnan hlut eins og aðrir. Þá er mikilvægt að það fari fram endurmat á makrílstofninum því gera má ráð fyrir að stofninn sé mun stærri en mælingar vísindamanna benda til," segir Friðrik.

„Vitað er að Evrópusambandið og Noregur stunduðu stórfelldar veiðar umfram útgefinn kvóta og var aflanum landað framhjá vigt. Þetta hefur skekkt mynd vísindamanna af stofnstærðinni og þarf að endurskoða. Skotar og Írar, sem voru einna stórtækastir í þessari svörtu atvinnustarfsemi, hafa nú verið dæmdir til að greiða háar sektir fyrir þetta athæfi. Þeir fara nú fremstir í flokki þeirra sem krefjast ólögmætra aðgerða gegn veiðum okkar Íslendinga, segir Friðrik.