Gjaldmiðlaskýrsla kynnt í dag

Klukkan fjögur í dag kynnir Seðlabanki Íslands nýja skýrslu um valkosti Íslands í gjaldmiðilsmálum. Í skýrslunni verður ítarlega farið yfir ólíkar myntir og kosti og galla þess að vera með eigin gjaldmiðil og í myntsamstarfi.

Skýrslunnar hefur verið beðið með nokkurri eftirvæntingu en upphaflega stóð til að hún kæmi út í byrjun sumars.

Í ritinu sem ber heitið „Valkostir Íslands í gjaldmiðils- og gengismálum," verður fjallað með ítarlegum hætti um mismunandi valkosti í gjaldmiðils- og gengismálum og þá þætti sem hafa þarf í huga þegar lagt er mat á heppilegasta fyrirkomulag þessara mála á Íslandi.

Í tilkynningu frá Seðlabanknum kemur fram að þótt megináherslan sé að skoða kosti og galla þess að leggja af krónuna og taka uopp evru með aðild að evrusvæðinu, spannar umfjöllunin einnig kosti og galla aðildar að öðrum myntsvæðum, upptöku annars gjaldmiðils auk annars konar gengistenginga.

Í ritinu er einnig fjallað um reynslu Íslendinga af núverandi fyrirkomulagi peninga- og gengismála og hún borin saman við reynslu evruríkja eftir aðild, í aðdraganda fjármálakreppunnar og í kjölfar hennar. Að síðustu fjallar ritið um stofnanauppbyggingu evrusvæðisins og þá stofnanaþætti sem þyrfti að breyta hér á landi gerðist Ísland aðili að myntbandalaginu.

Ritið er rúmlega 600 blaðsíður að lengd og fjöldi kafla er 25. Ritið verður aðgengilegt á vef Seðlabanka Íslands, www. sedlabanki.is strax að útgáfu lokinni