Vinnufélagar Halldórs Ásgrímssonar ósáttir við kjör sín

Starfsmenn Norðurlandaráðs og Norrænu ráðherranefndarinnar, sem hafa aðstöðu í Kaupmannahöfn, eru svo óánægðir með efnahagsaðstæður í Danmörku að þeir vilja að starfsaðstaða þeirra sé færð.

„Við erum óánægðir með það að danska ríkisstjórnin vill ekki undanskilja okkur virðisaukaskattinum. Laun okkar eru undir meðaltekjum annarra Norðurlanda og þá sérstaklega Noregs. Þetta þýðir að það er erfitt fyrir okkur að ráða starfsmenn frá öðrum ríkjum en Danmörku," segir Jan-Erik Enestam, framkvæmdastjóri Norðurlandaráðs, í samtali við danska blaðið Politiken.

Bæði Norðurlandaráð og Norræna ráðherranefndin hafa verið í Kaupmannahöfn um nokkurra ára skeið. Norræna ráðherranefndin frá 1986 og Norðurlandaráð síðan 1996. Um 120 manns starfa þar. Framkvæmdastjóri Norrænu ráðherranefndarinnar er Halldór Ásgrímsson, fyrrverandi forsætisráðherra.

Þessi óánægja hefur leitt til þess að fjármálaráð Norðurlandaráðs hefur kallað eftir skýrslu um það hvar best væri að hafa skrifstofurnar í framtíðinni.

Enastam segir að óánægja starfsmannanna helgist líka af því að danska ríkið hafi boðað níu prósenta niðurskurð á fjárlögum til Norrænu ráðherranefndarinnar á næstu þremur árum. „Ég á ekkert erfitt með það að búa í Danmörku. Þetta er bara spurning um það hvernig Danmörk og danska ríkisstjórnin vill koma fram við Norðurlandaráð og Norrænu ráðherranefndina," segir Enestam og bætir við að launin séu í samræmi við það sem starfsmenn danska stjórnarráðsins fá.  „Það er venja að stofnanir sem þessar greiði ofurlítið hærri laun en gengur og gerist. Þar fyrir utan ættum við að fá greitt aukalega í ljósi þess að stöður okkar eru einungis tímabundnar því við megum bara vinna störfin í mesta lagi í átta ár," bætir hann við.

Per-Kristian Foss, fyrrverandi fjármálaráðherra Noregs og formaður fjármálaráðs Norðurlandaráðs, er sammála Enestam. „Vandinn við launin í Danmörku og virðisaukaskattsreglurnar eru þær að þær leiða til þess að einungis fáeinir aðilar vilja vinna í Danmörku,“ segir Foss.