Icelandair sló aftur met í fjölda farþega

Icelandair flutti 271 þúsund farþega í millilandaflugi í ágúst eða fleiri en nokkru sinni fyrr í þeim mánuði í sögu félagsins. Þetta var aukning upp á 9% miðað við sama mánuð í fyrra.

Þetta kemur fram í flutningstölum frá félaginu fyrir ágústmánuð. Sætanýting nam 84,9% samanborið við 85,3% í ágúst í fyrra. Farþegum fjölgaði mest á N-Atlantshafsmarkaðinum eða um 19% og voru þeir 50% af farþegum félagsins.

Farþegar í innanlands- og Grænlandsflugi voru 36,9 þúsund í ágúst sem er lækkun um 3% á milli ára. Sætanýting nam 69,3% og dróst saman um 4,9 prósentustig á milli ára.

Fraktflutningar félagsins jukust um 5% á milli ára. Framboð á gistinóttum hjá hótelum félagsins jókst um 5% frá ágúst á síðasta ári. Herbergjanýting var 88,1% og var 5,8 prósentustigum hærri en í ágúst í fyrra.