Þórólfur Árna: Fásinna að fara gegn sitjandi forseta

Þórólfur Árnason, stjórnarformaður Isavia og fyrrverandi borgarstjóri, segir að hann hafi haft áhuga á að bjóða sig fram til embættis forseta sl. vor og hafi verið kominn með öflugan hóp stuðningsmanna á bak við sig. Hann hafi hins vegar metið það svo að það væri fásinna að fara gegn sitjandi forseta, Ólafi Ragnari Grímssyni.

Þetta kemur fram í viðtali við Þórólf í nýjasta tölublaði Viðskiptablaðsins.

Kom til greina hjá þér að bjóða þig fram til forseta?

„Já, ég hafði nokkurn áhuga á því og það var kominn öflugur hópur stuðningsmanna í lið með mér. En það var annar maður í starfinu sem var ekkert á förum," segir Þórólfur í samtali við Viðskiptablaðið.

„Ég mat það fásinnu að bjóða sig fram gegn sitjandi forseta í vor. Þú sást líka hvernig hann hélt á vopnum sínum í kosningabaráttunni. Hann vissi alveg hvað hann var að gera," segir Þórólfur Árnason.