Umfjöllun, viðtöl og einkunnir: FH - ÍBV 2-0 | FH með sjö stiga forskot

FH steig risaskref í átt að Íslandsmeistaratitlinum í kvöld er Hafnfirðingar unnu sigur á ÍBV í Krikanum. Sigurinn hefði átt að vera öruggur en FH gekk illa að klára færin og ÍBV hefði getað stolið stigi.

Yfirburðir FH-inga í fyrri hálfleik voru miklir. Þeir óðu í færum, yfirspiluðu andlausa Eyjamenn og svitnuðu varla við að verjast sóknartilburðum ÍBV.

FH fékk þrjú dauðafæri í fyrri hálfleik ásamt fleiri upplögðum marktækifærum. Það var ótrúlegt að staðan væri aðeins 1-0 í hálfleik.

Sú staða gaf Eyjamönnum von. Þeir spýttu í lófana og snéru leiknum sér í hag. Náðu að setja FH-ingana undir mikla pressu og voru ekki fjarri því að skora jöfnunarmark.

Þeir hefðu klárlega getað nýtt markahrókinn Tryggva Guðmundsson á þeim tíma en hann fékk aðeins að spila síðustu fimm mínútur leiksins. Undarleg ákvörðun í ljósi þess að Tryggvi var kominn í hópinn á annað borð.

Eyjaliðið er langt frá því að vera eins beitt án hans og hann er maðurinn sem hefur gert gæfumuninn fyrir ÍBV. Hann hefði hugsanlega getað gert það í kvöld en fékk ekki tækifæri til þess.

FH kláraði svo leikinn í uppbótartíma er Kristján Gauti slapp í gegn og skoraði sitt fyrsta mark fyrir FH síðan hann kom heim frá Liverpool.

FH með flottan leik og hefði með réttu átt að valta yfir ÍBV. Þeir gáfu þó svakalega eftir í seinni hálfleik og settu óþarfa spennu í leikinn.

Það var furðulegt að sjá leikmenn ÍBV dasaða í fyrri hálfleik í leik þar sem Íslandsmótið var undir hjá þeim. Þeir rifa sig þó upp en vantaði slagkraftinn til þess að ná einhverju úr leiknum.

Atli: Ekki komnir með neina putta á bikarinn

"Við fengum færi til þess að ganga frá leiknum í fyrri hálfleik og líka þeim seinni. Við fengum miklu fleiri færi en þeir en það gekk bara ekki að nýta þau," sagði Atli Guðnason FH-ingur sem fékk sinn skerf af færum en aldrei þessu vant var Atli ekki á skotskónum.

"Þetta var sætur sigur engu að síður. Það er alltaf erfitt að pressa í 90 mínútur. ÍBV er gott lið og það þarf ekkert að koma á óvart að þeir skildu koma sér inn í leikinn. Engu að síður áttum við að vera löngu búnir að klára þetta.

Atli var með báða fætur á jörðinni þó svo FH sé komið í afar vænlega stöðu.

"Það er þægilegt að ráða eigin örlögum. Við erum ekki með neina putta á bikarnum enn þá. Við munum halda okkur á jörðinni þar til bikarinn er kominn í hús."

Rasmus: Ekki nógu góðir til að verða meistarar

Daninn Rasmus Christiansen var svekktur eftir leik en reyndi að bera sig vel.

"Þetta er afar svekkjandi en FH var betra liðið í dag. Við mættum ekki klárir til leiks og réðum illa við pressuna þeirra," sagði Rasmus en seinni hálfleikurinn var miklu betri.

"Það var allt annað líf. Fórum að spila vel og við erum góðir í að láta boltann ganga. Við fengum færi til þess að skora og FH fékk líka færi í skyndisóknum.

"Við vorum inn í þessu alveg til enda en gekk ekki því miður. Við verðum ekki Íslandsmeistarar úr þessu og verðum að taka því. Við erum ekki nógu góðir til þess greinilega."