Segir ákvörðun Lilju ótrúlega jákvætt skref

Stjórnmálafræðiprófessor furðar sig á að Lilja Mósesdóttir, móðir Samstöðu, hafi kastað sterkasta vopninu frá flokknum. Stjórnarmaður í flokknum segir hins vegar Lilju hafa skapað ótrúlegt tækifæri fyrir Samstöðu með því að hætta sem formaður.

Í rauðabítið í morgun sendi Lilja frá sér yfirlýsingu þess efnis að eftir landsfund flokksins myndi hún hætta sem formaður flokksins Þar með verða báðir upphaflegir forystumenn þessa sex mánaða gamla flokks horfnir úr fremstu víglínu. Lilja kvað ástæðurnar einkum þær að ný framboð væru í mun verri stöðu en rótgrónir flokkar - fengju ekki styrki úr ríkissjóði - og hefðu verra aðgengi að fjölmiðlum.

„Maður klórar sér í höfðinu yfir þessu, að Lilja sé að stíga til hliðar og einhvern veginn að kasta frá flokknum sterkasta vopninu," segir Grétar Þór Eyþórsson, prófessor við Háskólann á Akureyri.

Spurð hvort hún sjái eftir Lilju bendir Kristbjörg Þórisdóttir, stjórnarmaður í Samstöðu á að Lilja sé ekki farin úr flokkum og verði áfram inni á þingi.

Lilja kvaðst með brotthvarfi sínu vera að axla ábyrgð á fylgistapi Samstöðu en flokkurinn hlaut undravert fylgi í fyrstu - þegar ríflega fimmtungur kjósenda studdi framboðið. Síðan hefur fylgið hrunið, var 7% í apríl og 2,7% nú í ágúst.

Kristbjörg óttast ekki að þetta verði banabiti flokksins. „Alls ekki. Ég held að þetta sé ótrúlega jákvætt skref. Mér finnst Lilja sýna mjög mikla mannkosti með því að sýna að Samstaða snýst ekki um eina manneskju," segir hún.

Nú í byrjun kosningavetrar eru því enn fjórir smáflokkar um hituna en þar er Björt framtíð ein með yfir fimm prósenta fylgi samkvæmt Capacent - sem er það sem þarf til að ná manni á þing.

Samanlagt fylgi smáflokkanna er því tæp 18 prósent.

„Þessir litlu flokkar eru ekki að ná miklu flugi, án þess að ég sé að afskrifa þá. Ég tel að þeir séu alveg í ágætum séns eins og staðan er í dag," segir Grétar.