Vildu ekki vera í sporum þeirra sem fá stefnuna eftir réttarhlé

Aðilar að einu af þeim tveimur prófmálum vegna gengislánanna sem búið er að þingfesta þakka fyrir að hafa fengið stefnuna í hendur fyrir réttarhléð. Þeir vildu ekki vera í sporum þeirra sem fá stefnuna í hendur eftir réttarhlé og hafa 2-3 vikur til að undirbúa sig fyrir fyrirtökuna.

Stefnan í umræddu máli er 28 síður og til viðbótar eru 75 bls af fylgiskjölum. Til að undirbúa málsvörnina þarf að fá sérfræðinga til að reikna út allar kröfur fjármálafyrirtækisins, sem eru níu talsins, ein aðalkrafa og átta varakröfur. Þá þarf löggildan skjalaþýðanda til að þýða nýfallna dóma Evrópudómstóls í lánamálum. Og allt hefði þetta átt að gerast á undraskömmum tíma en vegna þess að viðkomandi aðilar hafa haft sumarið til að undirbúa sig geta þeir rekið málið almennilega.

„Við hefðum ekki haft möguleika á að vinna þetta á 2-3 vikum. Núna eftir sjö vikur erum við rétt að komast í gegnum þetta,“ segja viðkomandi aðilar.

Prófmálin eru í heild ellefu en aðeins tvö hafa verið þingfest. Þau munu fá flýtimeðferð í dómskerfinu og því munu skuldararnir hafa takmarkaðan tíma til að undirbúa sig. Fjármálafyrirtækin hafa aftur á móti fengið marga mánuði til að vinna að kröfugerð sinni eins og gefur að skilja.

„Ég er alveg sammála því að það skiptir máli að flýta þessu eins og hægt er. En það verður samt að leyfa fólki að vinna þetta almennilega," segir aðili að málinu sem hefur verið þingfest. Hann hefur áhyggjur af því að skuldararnir í hinum málunum nái ekki að undirbúa sig nægjanlega vel vegna flýtimeðferðarinnar.

„Því þessi dómsmál skipta mjög miklu máli fyrir rosalega marga," segir aðilinn og telur mikilvægt að skuldarar í öllum málunum fari fram á þann greinargerðarfrest sem nauðsynlegur er. „Það er ekkert fyrir hvaða lögfræðing sem er að taka svona mál á tveimur þremur vikum."

Samtök lánþega taka undir

Guðmundur Andri Skúlason, formaður Samtaka lánþega, tekur undir þessar áhyggjur. Hann segist finna fyrir of mikilli tímapressu. „Það sem er sérstaklega alvarlegt er að við höfum heyrt af því að einhverjir skuldaranna séu ekki enn komnir með lögmann. Þá mun viðkomandi þurfa að setja sig inn í allt málið á allt of skömmum tíma," segir hann. Það gæti skilað sér í niðurstöðu dómsins.