140 þúsund krónur í skólamáltíðir á ári

Skólamáltíðir í grunnskólum landsins kosta að meðaltali þrjú hundruð og áttatíu krónur á dag. Það gera yfir fimmtán þúsund krónur á mánuði fyrir fjölskyldu með tvö börn á grunnskólaaldri. Verð á máltíð er hæst á Álftanesi en lægst í Reykjavík.

Kennsla hófst í grunnskólum landsins í gær. Skólabyrjun fylgja oft aukin útgjöld hjá heimilum við kaup á skólavörum, vetrarfötum og gæslu svo dæmi séu nefnd. Þá þurfa börnin að borða hádegismat og bjóða skólarnir flestir uppá heitan mat í hádeginu gegn gjaldi. Þetta gjald er hins vegar mjög misjafnt eftir sveitarfélögum.

Í Reykjavík er lægsta gjaldið, 310 krónur máltíðin og sama verð er í Mosfellsbæ. Á Seltjarnarnesi kostar skólamaturinn 385 krónur og í Kópavogi 395 krónur. Í Hafnarfirði hækkaði verðið um tuttugu og fimm krónur í haust og kostar nú máltíðin 400 krónur. Í Garðabæ er verðið 428 krónur. Álftanes er með hæsta verðið á skólamáltíðum eða 490 krónur. Þá kostar maturinn 350 krónur á Akureyri.

Meðalverð á skólamáltíð í þessum sveitarfélögum er því tæpar 384 krónur eða 7680 krónur á mánuði. Fyrir fjölskyldu með tvö börn á grunnskólaaldri er heildarkostnaðurinn því orðinn fimmtán þúsund og þrjú hundruð og sextíu krónur á mánuði eða um 138 þúsund krónur fyrir allt skólaárið.

Fyrirtækið Skólamatur ehf. sér um skólamáltíðir fyrir þrjátíu grunnskóla á suðvesturhorninu og gera þau þjónustusamninga við sveitarfélögin. Það er hins vegar mismunandi hversu mikið sveitarfélög niðurgreiða máltíðir til nemenda og eru það bæjarstjórnir eða borgarráð sem ákvarða það reglulega.