Ölvaðir, réttindalausir og reiðir í umferðinni

Nokkuð hefur verið um ölvaða ökumenn í umferðinni í morgun og hefur lögregla stöðvað fjóra ökumenn vegna ölvunar síðan klukkan 5 í nótt.

Einn þessara ökumanna framvísaði skilríkjum annars manns þegar lögregla stöðvaði hann. Síðar kom á daginn að hann er sjálfur réttindalaus.

Lögregla var einnig kölluð til þegar farþegi í leigubíl hafði ekki fé á reiðum höndum til að greiða leigubílinn og trompaðist af þeim sökum. Lögregla sefaði manninn og málið var afgreitt á vettvangi.