Færa op frárennslisins lengra frá ströndinni

Í gærkvöldi var heljarinnar plastleiðsla sjósett í Vestmannaeyjahöfn. Ætlunin er að tengja leiðsluna á næstu dögum við frárennslisrör bæjarins. Við þá breytingu færist op frárennslisrörsins 250 metra út frá ströndinni.

Það voru átta vinnutæki stór og smá sem komu að því að sjósetja leiðsluna auk tveggja skipa. Leiðslan er plastleiðsla, 260 metrar á lengd með 80 sentimetra innanmáli. Fullbúin með 54 tveggja tonna sökkum vegur leiðslan 134 tonn.

Leiðslan verður geymd á floti innan hafnar fyrst um sinn eða þangað til framkvæmdum í tengslum við frárennslislögn úti á Eiðinu verður lokið. Þá verður leiðslan sjódregin þangað og komið þar fyrir.